زينب يحسين تلكاهه
يحسين زينب ردت من ارض الشام
انشدهه عن ظيم السبي والالام
يوم الطحت ماخلت اعداك اخيام
ظلت وحيده بكربله بس ايتام
ولاواحد منكم يحماهه
ظلت وحيدة بكربله ومحتاره
كلساه عله يتامك تهب الغاره
عباس ظل عانهر بتاره
مهشوم راسه ويمنته ويساره
والكوس بعيمه وطفاهه
وراسك يبو اليمه برمح يتلاله
بطرف الجفن كلساه يصد لعياله
وزينب مدامعهه بحزن هماله
شافت شمر ويا لضعن يبراله
مجبوره تروح وي اعداهه
والحادي سدر بالضعن للكوفه
والعايله فوك الهزل مجتوفه
وراسك كتاب الله يرتل حروفه
واعداك شيمتهه الغدر معروفه
وبسبي اعيالك شفناهه
زينب تكلك مارحمنه اعدانه
لشام يبن امي النذل ودانه
بت حيدر شلون واطب ديوانه
كعدنه خويه بمجلسه وسبّانه
والبلعود اشفافك طكاهه
يحسن هسه عودت بعيالك
اخر وداع توادع وي اطفالك
ماتت رقيه هم تمر ابالك
ماكدرت اتفارك يخويه اخيالك
بتك بالشام ادفناهه
ليست هناك تعليقات:
إرسال تعليق